我係堅決唔建議普通散戶玩期權嘅。原因好簡單：你面對嘅對手係華爾街嘅專業交易員同機構，人哋有模型有速度，你點郁都慢半拍。

況且期權嘅「希臘字母」（Delta、Gamma、Theta 嗰堆）已經夠頭痕，仲要睇埋引伸波幅，學習曲線好陡。多數人輸錢都係因為唔明時間值流失有幾快。

如果你只係想倍大回報，不如直接買正股或者用少少錢買高增長 ETF，起碼唔會歸零。期權就留番畀真係摸熟規則、有閒錢蝕得起嘅人啦。