本身我都係新手，上年開始月供，講下自己感覺。我覺得月供最啱我呢種驚高又手痕嘅人——你唔使成日估頂估底，設定好每個月幾多錢自動扣，跌市當平啲買多啲，升市當儲緊。心理上真係舒服好多，唔會成日諗「點解唔早兩日買」。

唔過有幾樣要醒你。第一，手續費同匯價。香港呢邊月供平台好多聲稱零佣金，但匯率差價食你一截，長遠都唔平，最好比一比。第二，月供就唔好貪心去揀單一隻股，我係揀 VOO 呢類追標普 500 嘅廣基 ETF，瞓得着覺。

至於等回調？講真，邊個知幾時回調。我試過等咗半年都等唔到，結果個市越嚟越高，白白唔住車。所以如果你係長揸（5 年 10 年嗰種），而家開始月供同兩年後開始，分別未必好大，最緊要係開始咗同持續到。一句講晒：驚高就分注，唔好一次過 All in，月供係懶人嘅好朋友。